Cuissà se la Russie e la Ucraine a àn za finît la vuere dal gâs ma intant une piçule bataie si je scombatude ancje a cjase mê. No sai ben se par colpe dai rus o dai ucrains, fat al stâ che stemane passade mi si è rote la cjalderie: nie aghe cjalde e nie riscjaldament!

O ai subit scugnût doprâ lis riservis strategjichis: vistîts pesants par stâ in cjase, cusinute economiche e stufutis eletrichis a manete, borsis de aghe cjalde e vie a sfladâ i termosifons, a lei il manuâl dal imprest e a traficâ cul termostat.

La situazion no si è risolvude e ae fin o ai scugnût passâ de mê cognossince virtuâl de cuestion a chê vere dal tecnic che, un cuatri dîs dopo, cuant che al è rivât, intun vinç minûts al à sistemât la robe.

Cuissà se saran il lavôr vêr e la economie reâl, a puartânus fûr di cheste crisi economiche (che somee propit brute) e che e je nassude de masse economie virtuâl.

Par intant l'unvier al somee frêt e une vore lunc...