Cul gnûf an, ducj ingubanâts cul mangjâ des fiestis e cun ancjemò in bocje il savôr dal mandolât, al è normâl metisi a filosofâ sul timp che al passe. Fra un taiut e chel altri la mê riflession dai ultins diis e je stade che no si cjate plui la gubane di une volte.

No stoi fevelant di chê di for, o cognòs cualchi puest a Cividât e su pe Sclavanie dulà che la si cjate inmò buine, chê che o intint jo e je chê industriâl. Par capî ce che o ai voie di dî si à di taiâ un fete di gubane industriâl e, prime di mangjâle, metile dongje a la foto che e je su la scjate.

La fete de foto e je biele, si viodin i pignûi, la ue passe, i tocuts di cocule e di nole, la fete vere, chê che e je stade juste taiade, e à invezit dentri un paston di robe dolce, sperin almancul fat cui stes ingredients...

Ma no je dome la estetiche che e je cambiade, al è il savôr che nol è plui chel.
Forsit parcè che un timp e jere artesanâl e cumò e je industriâl.

Ma il biel al è che une volte, cuant che e jere buine, e vendeve dome ca, cumò e vent par dut e no si fâs masse fature a cjatâle intai centris comerciâi ator pal marimont. O imparin il marketing e o disimparin a fâ lis robis ben.

Prin salt dal crot: mi àn dite che cuant che si comence a disi robis tant che "ai miei timps sì che la gubane e jere buine, migo come vuê...", aromai si stâ lant di ribe jù cui agns...

Secont salt dal crot: ancje se o mi lamenti de gubane, sul slivoviç no ai nuie ce dî.

3 coments:

  1. furlan ha detto...

    E je vere jo une volte ad an o cerci chê fate in cjase. Chest an le ai nome nasade. Oh, ai mei timps!
    Daur de gubane, nome chê no je plui come une volte? Nô no sin plui chei. A mi, par esempli, lis lûs di Nadâl mi tachin a dâ di gomit. Chest an o soi rivât, rimande che ti rimande, a sparagnâ chel lavôr.  

  2. ILfurlanist ha detto...

    Mai cerçât une fate in cjase... une volte la Giuditta Teresa e jere buine, cumò mi an dit che la cualitìat e je lade in mancul  

  3. Jaio ha detto...

    Infat, vuê al vinç chel ch'al sa vendi:-)