Cu la disocupazion che e sta cressint a cressarano ancje lis tensions cuintri i imigrâts?

O volti la riflession in une altre maniere: isal il nestri un paîs razist?

Ai talians i plâs pensâ di no, anzit e je dute une mitologjie daûr che e propagande la idee dal talian "brave int", bon di cûr cun ducj ancje cuant che il câs o la storie lu met in situazions dificilis.

Il talian al sarès stât bon in vuere, bon intes coloniis, bon cui ebreus e sot sot al varès simpri boicotât lis leçs raziâls e i ordins no juscj dai siei sorestants.

Cheste biele mitologjie si je vuastade cul probleme dai imigrâts. Chel fenomen gnûf dai ultins cuindis-vinç agns dulà che la presumude bontât e varès vût di vignî fûr.

Cussì nol è stât e anzit in tancj a àn tacât e a continuin a meti su fûc cuintri i forescj.

La problematiche e va di sigûr frontade ma tantis des robis che vegnin fatis o proponudis mi fasin dome che vignî i sgrisui.

Cuant che al capite cualchi biel sassinament la prime notizie che e ven fûr e je che a son stâts dai stranîrs, probabilmentri sclâfs, rumens o nordafricans. Magari dopo si scuvierç che e je stade la fie cul morôs o che a son stâts i vicins di cjase.

Masse voltis o fâs fature a pensâ che cheste e je la nazion dulà che o vîf.

Cun tante int che continue a semenâ aiar o ai voie di viodi ce che si seselarà.

1 coments:

  1. la Morete ha detto...

    La preocupazion e je juste in ducj i setôrs, cumò come cumò. Chel che mi preocupe di plui al è che cuant che al è alc di fâ par cualchidun che al à bisugne, che al sedi talian o forest, la int, no, no la int, ognidun di nô si volte par là di là, pensant a cjase sô e ai soi problems. Ma chei di chei altris a son ancje problems miei. Se jo, jo e simpri jo mi fâs caric di un, un sôl problem di un altri e lu judi, lu judi e lu judi, magari o risolf un probleme. Magari no salvi la umanitât de catastrofe, ma o ai fat il gno. Nol è cussì facil e al pese, cualchi volte cussì tant che al ven di domandâsi "ma cui m'al fasie fâ" e li un al à bielzà pierdût...