Fradis









Cuant che o sint lis notiziis di un taramot, che al sedi ancje lontan vinç mîl chilometris, o resti simpri fer ingropât cuntun sens di apartignince che dome cui che al à cognossût l'orcolat al pues capî.

I miei a son ricuarts di frut, là che o jeri jo di dams a 'nd erin stâts pôcs. Lis scossis dal Setembar in particolâr a vevin lassât cualchi crepe su la vecje cjase e la Primevere dopo o sin lâts vie e o sin vignûts a Buri.

O sin lâts intes cjasis popolârs gnovis. Li a jerin ancjemò diviersis fameis di Glemone, di Vençon e di altris puescj dulà che al veve pocât un pôc plui fuart. A jerin fameis zovinis puartadis ca vie par passà l'unvier.
Al jere plen di fruts. O vin zuiât tant.

Dal Mai dal '76 mi visi la pôre, mi visi di mê e di gno fradi metûts a durmî in machine; la vecje maggiolino di gno pari. Mi ricuardi lis gnots in tende...

Il pensîr cumò al va a la gnot che a passarà la puare int dal Abruç.
Tignît dûr fradis.

3 coments:

  1. Jaio ha detto...

    Po ben, fradi, forsit al é ancje par chel che tancj furlans a no tornin plui in Patrie.E s'al varès di rivâ da te, da me le puarte a é simpri viarte. Impensicjal. Tegniti dacont.  

  2. furlan ha detto...

    Ancje jo sintint de disgracie da l=Aquila o soi tornât indaur a le mê. Par me e je stade ancje une furtune, une specie di rît di iniziazion, a deventâ prin de ore grant lant a scavâ cu lis mans e a patî la sêt di chês zornadis cjaldononis...  

  3. la Morete ha detto...

    O vuei fâti i augûrs par une buine Pasche, Crot, a ti e ae tô famee.
    Maman