La plui part dai articui di stampe cuintri la tutele de lenghe furlane vignûts fûr tal ultin an, stiçâts dal dibatit su la gnove leç sul furlan, nol è che meretave di jessi lete. Par caritât al è simpri just lei e al è ben che cualchidun al savedi ben rispuindi, ma par solit, il nivel inteletuâl des argomentazions al jere cussì bas che, gjavant il gnervôs, al vignive voie di lassâ pierdi e vonde.
Sul articul di Paolo Rumiz sul Messaggero di Sabide stade o ai invezit voie di disi alc se no altri parcè che Rumiz lu lei vulintîr e mi visi i siei reportage su la tragjedie jugoslave e lis contis sui soi viaçs atôr pe Europe une volte in biciclete, une altre cu la topolino e magari la volte dopo in tren.
Cheste volte no soi dacuardi cun cuasi nissune des tesis sostignudis tal articul. Anzit plui di cualchi argoment mi somee avonde debul. Su une cuestion o ai dut câs voie di fermâmi, ven a stâi cuant che, ae fin dal articul, al paragone la difese de lenghe furlane al soflâ sul nazionalisim fat di Miloseviç ae fin dai agns '80.
A dî il vêr no je la prime volte che Rumiz al evoche i Balcans fevelant dal Friûl. Mi visi che intun dai soi reportage di viaç, passant des nestris bandis e viodint ce tantis insegnis di buteghis e di fabrichis a vevin la peraule Friuli tal non, al scriveve che chest al jere un segn de influence dal nazionalisim balcanic des etniis che al rivave ancje in Italie.
Inte realtât la storie dai moviments autonomiscj furlans e je aromai avonde lungje e varie, ma se e je une robe che si pues disi su di lôr e je che no àn mai vût carateristichis violentis, la violence no je mai stade ni teorizade ni pensade. La lote pal furlan e je nome une domande di ricognossiment di dirits e cheste e je une bataie di civiltât puartade indenant in mût pacific te convinzion che cuant che si rivarà a bon fin si varâ fat si il ben dal Friûl ma si varâ fat ancje cressi il nivel civîl de Italie.
Christian al à metût l'articul di Rumiz sul sô Blog.
O pensi che tu le vedis za viodude, ma e je une rispueste a Rumiz pardabon biele di Guglielmo Pitzalis sul MV di lunis.
Si le vevi lete, al à rispuindût ben.
Grazie per essere passato! molto bella!
Ancje i miôrs, e Rumiz al è un di chei, a falin. A mi à dât fastidii nomenâ cualchidun, ancje se al ves reson, il fat di nomenâlu. No si tirin in bal, o pensi, muarts, par tirâiu de tô bande. No sai, ma mi e sameât fûr lûc.