Viodint i altris blogarins furlans, fûr che il Dreut ben incuadrât, mi somee che par Sant Valentin a sedin deventâts ducj bulos! Si cjate chel che nus ricuarde che aromai la mode americane di bombons e de fieste dai inamorâts si slargje pardut, ma in Friûl Sant Valantin al è patron dai epiletics” a chel altri che justementri al dîs che se jê lu sa ce lu disio a fâ. Se no lu sa o e je sorde, vuarbe e çompe, o pûr no vûl savê 'nt”.

Dutis veretâts ma jo personalmentri al è za di cualchi dì che o ai vût dai avertiments cun frasis ditis par câs come “passant doman o sin za ai 14, aromai l'unvier al è finît”, che mi sa tant che a son stadis ditis cun chê abilitât strategjiche tipiche des feminis cuant che a an pôre che il lôr simiot si dismenteedi come al solit di un aniversari.

Fat al è che o vevi progjetât diviersis alternativis, une miôr di che altre. O vevi pensât di passâ par Udin par là a cjoli lis clavutis a Borc Praclûs e di cjapâ su un biel macet di rosis di cjamp (la stagjon juste!) o, se no rivavi, almancul di fermâmi te buteghe des rosis a comprâ un pôcs di garofui.

Ma si sa che chel che al vinç intal om al è simpri il simiot e cuant che tornant a cjase mi soi visât di ce che o vevi di fâ e o ai viodût ce ore che jere rivade no mi è restât che fermâmi tal prin puest ancjemò viert e comprâ almancul une scjatute di bombons.

Je propite vere, cui cjocolatins no si sbalie mai.

2 coments:

  1. ILfurlanist ha detto...

    ...e dopo o soi jo che cuadrât ;-)  

  2. il crot ha detto...

    No ai nissune difese e o pues dome invocâ la clemence dal judiç o almancul sperâ intun indulto...

    PS: i professôrs dal istitût di filologjie romanze de Sorbone di Parigj a àn dimostrât che la peraule indulto no je tradusibile par furlan.