Storiis

In font a viâl Triest a Udin si rive in place Oberdan, passant par là mi è vignude voie di contâ dôs storiis di cent e passe agns indaûr.

La prime e je che di Wilhelm Oberdank cognossût in Italie come Guglielmo Oberdan, zovin nazionalist triestin che tal 1882 al veve cirût di copâ l'imperadôr Austriac in visite a Triest. L'atentât al falì e il zovin atentadôr al fo condanât a muart e picjât.

Al è considerât un dai grancj martars dal patriotisim talian, su di lui a son stadis fatis poesiis, cjançons, placis e scuelis.

La seconde storie e je che dal republican Giovanni Passannante nassût a Salvia di Lucania tal 1849. Cuant che il re talian Umberto I al visità Napoli intal 1878 lui al à cirì di curtissâlu. Cjapât e impresonât al fo torturât par fai confessâ i nons dai siei compliçs ancje se inte realtât al veve fat dut di bessôl.

Sô mari, di plui di setante agns, i siei fradis e lis sûrs a forin metûts in manicomi par il rest de lôr vite, il sô paîs al scugnì cambiâ di non e ancjemò vuê si clame Savoia di Lucania.

Passannante al fo condanât al ergastul. Al fo sierât incjadenât intune preson cence lûs e cence cagadôr, alte 1 metri e 40. Nissun i podeve fevelà. Dopo agns di preson, une volte deventât mat, al fo trasferît in manicomi. Muart tal 1910 i fo taiât il cjâf che al fo tignût in mostre al museu criminologjic de aministrazion penitenziarie dal 1936 al 2007 cuant che ae fin al fo soterât.

Dôs storiis di terorisim une vore tristis e malinconichis, dôs storiis talianis.

2 coments:

  1. ILfurlanist ha detto...

    Daûr di cheste storie piês il stât talian dai mucs: no sarà stade la pene dimuart ma cjapâse ancje cu la famee...  

  2. Jaio ha detto...

    Si le ai sintude ch'a nol é tant: Il curtis al ere un temperin di nue.Bisugne dî che in chê vôlte, lis reazions a erin simpri esagjeradis.