Cuant che un al tache a scrivi par furlan, prime di rivâ a la cuestion plui impuartante (ven a stâi ce robe scrivi), si cjate denant une serie di problemis “tecnics”: ce grafie doprâ e in ce lenghe (ce varietât) scrivi.

Za il capî che a son dôs robis di frontâ difarentis fra di lôr al è un ostacul no di pôc, cumò o dîs la me contant ce che o ai fat jo.

Prin di dut o disarai che fra scuele, universitât e lavôr o ai vût scrit e let tant par talian e, di sigûr mancul ben, ancje in cualchi altre lenghe, soredut par inglês. Par furlan scuasit nuie, ancje parcè che al jere dificil cjatâ alc di scrit e chel che si cjatave al jere dut masse “folcloristic”: lis tradizions di une volte, i lavôrs di une volte, i zûcs di une volte, e ce pâr di balis di une volte…

(E si che te musiche o tal teatri robis plui modernis si viodevin... O ai di dîsi che cumò che o ai imparât a cirî o rivi a cjatâ alc di lei che mi interessedi)

Un biel dî mi soi impensât che, viodût che lu fevelavi, e jere ore di imparâ a scrivilu il furlan, in fin dai conts inte vite o ai vût di imparâ tantis robis ben plui dificilis…

Cussì o ai tacât. O ai tirât fûr cualchi librut o ai scomençât a scrivi regolarmentri e a lei dut chel che o cjatavi atôr (e Internet alc al jude).

O ai imparât a doprâ il gnûf stîl de grafie, chê che e ven clamade, cuntune peraule une vore brutone, grafie standard.

Di grafiis minôrs atôr a 'nd è une vore, tant che e je stade (e in part e je ancjemò) une vere vuere des piputis fra i partesans des diviersis grafiis, cun tancj di lôr che si son ruvinâts un grum di gnots pal gnervôs par ce che cualchidun altri i diseve che si veve di scrivi duč invezit di duc' o invezit di ducj, lassânt stâ i duciu o ducju o saio jo ce altri.

Jo o scrîf ducj (su cemût che lu lei o disarai inte seconde pontade…) ma chest e je nome une cuestion tecniche, se cualchidun al scrîf intune altre maniere lu lei istès, nissun boicotaç e nissune pretese di superioritât. Take it easy. No stin a bacilai masse.

Nol è che dutis lis convenzions de gnove grafie mi plasedin (no sai, par esempli mi plasarès scrivi salamp di San Martin invezit di salam di Sant Martin), ma ancje chês altris grafiis che o viôt atôr e an robis che no mi plasin. Dut câs o ai un sisteme e des regulis par scrivi.

Une alternative e sarès; inventâ jo une gnove grafie e tacâ la mê vuere des piputis, magari cun cualchi biele letare (par talian) sui gjornâi…

5 coments:

  1. Jaio ha detto...

    O crôt che il furlan, tant ch'al a tantis grafiis a nus lasse di scielgi ce ch'o volín. O disarès ancje ch'al nus lasse le libertât di inventâ gnovis peraulis. Tant ch'a no si diseve nuje, al restave il vecjo furlan dai nestris vons. Cumó ch'a si a da scrivi, al tocje adatâsi. Jo ch'o dopri une tastiêre francês o cjati facilmentri ducj i acents ch'o ai bisugne. Mi mancje dome la ó. Par jê o scuen fâ le letare e l'acent separatamenti (sic). Cuant ch'a si scrîf ogni dí,al scomençave a dâmi fastidi di scrivi chei
    'n dé o in d'é, a 'n dé e vie vie e o semplifichi le grafie fasint dome une peraule e cussí al devente ondai, andan, andé, onvês e vie vie ch'a son un grum plui cool.  

  2. ILfurlanist ha detto...

    Biel chest prin «Disgrafiis»! Mi met in poltrone cu lis muiniis (popcorn) spietant chei altris...

    Jaio, come il solit tu fasis dut un pestel: tu varessis propit bisugne di cualchi lezion :-D  

  3. Andri ha detto...

    vê une grafie standard al è impuartant par tantis robis, se a son plui di une tu pierdis timp secont me, po scrivi al è dificil parcè no tu lu àn insegnât, se ti lu insegnassin a scuele al sarès normâl. jo feveli un grum diviers dal standard però mi adati... ma se mi domandassin a mi, jo cambiaressi chel che tu âs dit tu salamp di sant martin e ancje no metaressi la e intal mieç des peraulis: miôr "viarzi" che "vierzi"  

  4. il crot ha detto...

    x Jaio: di sigûr chel de tastiere al è un biel probleme e chê francese e je chê che à mancul fastidis cu lis "piputis"...

    xl Furlanist: muinis? No sono masse neris? Di solit si clamin "sioris", si viôt che lis tôs a devin jessi un pôc masse brustulidis!

    xl siôr dotôr Andri: o soi dacuardi cun te.  

  5. Anonimo ha detto...

    Tant che nissun a nol rivarà a fâ le grafie come ducj, tant al vâl fâle come nissun:-)
    Jaio