Vuê o fâs jo come il brâf furlan e o conti un dôs robis sul spetacul di îr di sere dal Teatrin dal Rifo a Sant Zorç di Noiâr.

O ai puartât a viodilu ancje il me fi plui grant parcè che si tratave de dopleadure dal vîf di un pôcs di cjartons animâts di Berto Lôf. A viodilu a saran stâts almancul un cent e cincuante di lôr, cussì che a àn scugnût zontâ un pocis di cjadreis: int di dutis lis etâts, zovins e vecjuts, di chei che son lâts fûr cun chê di là a cjapâ un pôc di fresc ai plui piçui che di solit a chê ore a son za a durmî e che a si son gjoldûts un grum il spetacul, (ancje chei che cui nonos a fevelavin par talian).

La traduzion dai tescj e jere di Paoli Patui e prin di scomençâ e je stade lete une sô curte ma biele presentazion cun cualchi riflession su la disfide che e je il tradusi e su la elasticitât che lis lenghis veris a mostrin cuant che passant di une a chê altre si àn di lâ a cirî lis peraulis justis par tignî il significât vêr al di là de traduzion leterâl.

Po dopo al è partît il prin episodi che al è stât mandât prime par talian e dopo dopleât dai atôrs par furlan fasint capî la dificoltât, la bravure e disin ancje la professionalitât che e je daûr.
Si è lâts indenant cun altri cuatri, cinc episodis e, intant che i fruts (e i grancj) a ridevin o ai amirât il biel mistîr che al è daûr ae bravure dai atôrs.

Viodude la dificoltât a cjatâ robe par furlan par fruts al sarès biel che il materiâl metût adun o produsût de Rai al fos metût a disposizion su Internet e che al fos pussibil comprâ i DVD.

3 coments:

  1. Brâf Furlan ha detto...

    Ti ringrazi pe citazion. E je une maniere par fâ zirâ une informazion su lis robis furlanis che si viodin ator. E jo o ai aprezât chest to contâ une robe che jo no ai viodût,
    Jo la ultime robe dal Rifo che o ai viodût no mi jere plasude (Due uomini e un cullo). Chê volte par no scrivi malut no vevi scrit nuie.  

  2. Jaio ha detto...

    Le regjon, ch'a no sà cemût spindi i soi bêz, e varès di promovi chescj spetacui e metiu sù internet amancul par chei che come me a no san lâ a viodi.  

  3. il crot ha detto...

    # Pal brâf furlan.
    Stant che intai ultins agns no rivi a là a viodi dut chel che o varès voie, ti lei simpri cuntun pocje di invidie....

    # Par jajo
    In chest câs e varès di spindi la RAI, e no il canone a ie i scugnin paiâlu....