Al è stât assegnât il premi leterari San Simon pal 2009. Al à vinçût il romanç "Coventave vê pora?" di Alberto Luchini cun cheste motivazion "Un pinel cjatât ta un supermarket al devente stroment di indagjin interiôr: al salte fûr un cuadri dulâ che, tal rapuart di un omp cu la sô femine, ancje i lûcs comuns a vegnin acetâts intun contest di cotidianitât mai esaltade ni esecrade e dulà che il sens dal dut al polse intune inelutabile dissipazion de esistence."

E je stade ancje segnalade de zurie la opare "Dôs di trê" dal brâf furlan Stiefin Gasti. Storiis al di fûr dal Friûl tradizionâl, te prime si fevele dal unabomber, te seconde di un serial-killer di prostitudis a Udin intai agns 70.

La zurie presiedude di Carlo Tolazzi e veve dentri Franco Marchetta, Mario Turello, Giacomo Vit e Aldo Colonnello.
In confront al mieç disastri dal an passât ste volte a son stadis presentadis 12 oparis, di chestis, pe zurie, uns trê a vevin la dignitât dal romanç.

Carlo Tolazzi al à pensât ben di mandâ un coment al Messaggero dulà che al al pant lis ideis de zurie su li oparis presentadis e su la situazion de narative furlane di vuê.

Tolazzi al dîs un sac di robis interessantis e o pensi avonde condivisibilis. Su plui robis al sarà il câs di tornâi parsore e di viodi ce coments che a vignaran fûr ancje su la stampe.

Fra lis stiçadis intrigôs il toc sui colaboradôrs de Comugne che "par snobisim o par incapacitât di rezi la lungjece dal romanç" no partecipin al San Simon...

8 coments:

  1. ILfurlanist ha detto...

    Su la cualitât dai lavôrs che a rivin al Sant Simon probabil al à resonone, ma par Tolazzi la produzion leterarie di une lenghe a son nome i romançs? Mah.
    1) Cheste grande produzion di romançs tal passât la viôt nome lui: il discors "une volte si stave miôr" mi puce di naftaline, al starà deventant vecjio.
    2) La produzion leterarie e je fate di contis, poesie, teatri, publicistiche e - par chei che no son snob come che lui al dîs di chei altris - ancje fumetistiche. Daûr dal so discors, Pasolini - di cui si emplin la bocje ducj - nol à fat nuie par furlan.

    Podopo la sieradure citant par fuarce Facebook che al va di mode e al va di mode demonizâlu no mi samee cuissà ce...  

  2. Jaio Furlanâr ha detto...

    Forsit o ai tuart di no cognossi ni Tolaç ni Comugne ma o ai reson di crodi che se Tolaç al cjape pal cûl chei de Comugne, dut ce ch'al dîs sul rest al mi somee sospiet.
    Il so discors al mi sune cussí: Nô no sin come chei de Comugne, o sin miôr...Alore no viôt il parcé che chei de Comugne e varessin di sotometisi al so mût di viodi se bielzà a son tratâts di badoclis prime.  

  3. Anonimo ha detto...

    Tal moment de premiazion nol è staat fat un discors cussì sclet cuintri la leteradure furlane. par chel o soi un poc stiçaat. Se lu ves dite là al varès vuut ancje reson, ma dìlu tal MV al è masse facil, butà un ton cussì che al è dificil rispuindi e po cui e parcè, jo no. Dut caas a dì maal cui prodest, puartial ben ae leteradure furlane, a lui? Jo o croot che come che al diis Mattiuzza a saran altris manieris par sburtaa la leteradure, la conte curte, mancul di sessante cartelis. No sai ce dì su la propueste di fà un an par talian di furlans che a scrivin dal Friuul. Come che al diis il Dree ancje il fumet ma alore che al provi lui a partecipaa al S.Simon cul fumet, jo no soi bon. A mi mi plasarès contaa dal Friuul di vuee. Cui soi difiets e la soo fuarce. Par chel o soi content che al vedi vinçuut un che al conte di unabomber, al met lis mans tal penç dal dì di vuee. Mi displaas che si cjacari maal, e ce tant maal di cui che i met passion, timp, inventive, sacrifici. E cence tornecont. I zuraats une paie la cjapin, par chel a varessin di vee mancul puce sore dal puest di privilegj che a àn. Cumò mi soi sbrocaat. Scusait. BF  

  4. il crot ha detto...

    Cul Dree mi visi che si jerin za cjatâts dacuardi tal criticâ la idee che nome il romanç lunc al sedi "alte leterature", franchementri mi somee une idee une vore vecje....
    Naturalmentri o pensi che se tu mandis al San Simon un libri di contis chestis no vedin di jessi metudis a câs ma a vedin di vê une coerence fra di lôr (come che al è stât in libris di contis che à àn vinçût intal passât...).

    Dut câs l'articul di Tolazzi al è interessant ancje parcè che al met par iscrit ce che al stâ disint di un pôcs di agns in ca. Lassant stâ facebook e la sparade su la Comugne, dut il discors che al fâs su la lenghe standard al clope un pôc (al somearès scuasi che la crisi de leterature furlane e sedi par vie de politiche dal Arlef e de publicazion dal Diari).

    Une vore interessant invezit il discors sul fat che l'autôrs furlan medi al sedi estrani a chel che al ven fat te leterature dal rest dal mont e che nol sedi par chest bon di contâ storiis universalis (chest lu zonti jo).
    Isal vêr? E valial propit par ducj?

    Ce che mi fâs restâ al è dut câs la sensazion che (come ancje intai ultins doi agns) nol someedi cunvint dai premis, scuasit che al vedi scugnût daju ma che no fossin meretâts. Forsit che chei puars autôrs premiâts o segnalâts a fasedin miôr a smetile di scrivi par furlan?  

  5. il crot ha detto...

    La discussion e je continuade in maniere interessant intal blog dal brâf furlan e dopo su Contecurte  

  6. Jaio Furlanâr ha detto...

    Ah, Crot, a tu âs vût l'onôr di vê vût il Tolaç come letôr parcé ch'al mi à scrit par vie di cê che o ai dite achi da te:-)  

  7. il crot ha detto...

    Bon, o speri che chês cuatri madonis che ti varâ dite, che di sigûr ti lis à dite, ti lis vedi ditis ben!!!  

  8. Jaio Furlanâr ha detto...

    Nue mâl, graziis...Al mi à scrit par talian.