- Balon -



O sai benissim che al è dut fint, aromai dut studiât dome par jessi mandât pe television, cui zuiadôrs mercenariis deventâts modei di vite e di pensîr, cu la int tignude cuiete par no pensâ ai veris problemis, cui arbitris comprâts e vendûts, cul doping e cun cuissà ce altri ancjemò. Ma cuant che o ai viodût chê bale rivâ lizere di metât cjamp e Di Natale che le cjarece dôs voltis cul pît, la prime par cuietâle e la seconde par mandâle a balonet al di là dal difensôr e dal puartîr, (puars cocâi!), ben o ai tacât a saltâ e a vuacâ come un frut.

Se tu i pensis parsore dopo tu viodis che a 'nd è pocje di razionalitât, ma ce puedie jessi di razionâl intune robe che si fâs cui pîts?

Dal balon mi vegnin iniment altri robis; de bale di cjarte che o dopravin par zuiâ tai curidôrs a scuele a lis voltis che o ai rot i ocjâi zuiant cuntune plui dure.

Mi ricuardi di chê volte che mi àn puartât a viodi Zico alenâsi a bati lis punizions al Moretti. Prin tîr, tal siet, secont tîr, tal siet, tierç tîr, tal siet di chê altre bande; al jere come viodi la publicitât di Ronaldhino, ma dal vêr, cence efiets speciâi.

E mi visi di cuant che e jê finide la partide cul Ajax, ducj in pîts a bati lis mans, nissun che al voledi la vie…

No, di razionalitât no 'nd è. Forsit par chest a contâlu il balon a son stâts in tancj:

Par fâ dome cualchi non, i prins che mi vegnin iniment, o met lis contis di Futbol di Osvaldo Soriano, o la Febbre a 90° di Nick Horby (al è famôs ancje il film che a an tirât fûr dal libri), vignint plui dongje mi ricuardi lis fotos in blanc e neri di Pasolini che al zuie (o ai metût ancje un video in une lenghe no masse foreste, provait a viodi trop che si capìs) o l'episodi di Pidin D Citadin V intal Donald dal Tiliment di Stiefin Morat (par contâ l'anime anarchiche che o vin, no ducj e no simpri sants e lavoradôrs!).

La miôr batude sul balon che o cognòs e je par Triestin, la diseve il famôs alenadôr Nereo Rocco cuant che, prime di tacà la partide, il coleghe aversari i dave la man augurantsi che al vincedi chel plui brâf: "Speremo de no" e jere la rispueste.

5 coments:

  1. ILfurlanist ha detto...

    Ti consei di lei ancje chest di Bete di Spere su "la Patrie dal Friûl" ;-)
    e magari linkâlu

    http://www.lapatriedalfriul.org/?p=265  

  2. Anonimo ha detto...

    e alore ancje "splendori e miserie del gioco del calcio" di eduardo galeano ........  

  3. il crot ha detto...

    # pal furlanist:
    Alore o met il link al
    articul di Bete

    #pal anonim:
    bulo ancje Galeano! Mi visi ancje une interviste di Ken Loach che o vevi let, ma plui un al pense plui i vegnin su robis, par esempli un film che mi jere plasût di un cualchi an indaûr (adiriture cun Tognazzi) al è "All'ultimo minuto" di Pupi Avati  

  4. Brâf Furlan ha detto...

    No ti crodevi cussì pôc razionâl e po par une robe fate cui pîts.  

  5. Anonimo ha detto...
    Questo commento è stato eliminato da un amministratore del blog.