Mister bisiac

Fasint un zîr in biciclete, di Pieris a Dael lant dopo a finîle a Marian, in pôc timp, si passe pai paîs dulà che a son nassûts Fabio Capello, Enzo Bearzot e Dino Zoff.

Cemût mai tancj di lôr cussì brâfs cussì dongje? Ise par vie dal aiar bon, dal vin just o nome par câs?

Fat al è che chei trê ca, sedi come zuiadôrs che come alenadôrs, a àn vinçût dut chel che a podevin vinci.

Cumò che chel plui zovin al è deventât alenadôr de Ingletiere mi ven iniment une storiute su di lui di cualchi an indaûr.

Al sarà stât tal '93 o tal '94 cuant che une zovine des bandis di Manzignel e jere stade ricoverade tal ospedâl di Udin par jessi operade.

E veve si e no un vincj agns e fra lis feminis de sô cjamare, in chês bielis cjamaris di ospedâl plenis di jets, e cognòs une vecjute che e je la agne di Capello, ancje jê li ricoverade.

In chê volte i zuiadôrs dal Milan, i Maldini, i Costacurta, i Albertini, a jerin ancjemò zovins e biei e la frute e pense ben di dâ ae agne di Capello une letarute pal alenadôr dulà che i contave, che jessint une vore timide e cence morôs, e varès vût tant gust di cognossi cualchidun dai zuiadôrs dal Milan e i domandâve se lui la podeve judâ.

Al passe cualchi dì e subit dopo la operazion la agne di Capello i puarte la letare di rispueste dal alenadôr.

Inte buste al veve metût dentri lis fotos dai zuiadôrs che i vevin fat une dediche e la firme, e dopo, scrit a man, lui i spiegave che al jere dome l'alenadôr e che ancje se nol veve masse plasê che i siei zuiadôrs a vessin masse distrazions, pes morosis, aromai, si rangjavin di bessôi. Le saludave di cûr e i faseve i auguris di vuarision.

A son chês piçulis robis che un personaç public al à probabilmentri simpri il dovê di fâ ma che, une volte fatis, a fasin simpri plasê.

4 coments:

  1. ILfurlanist ha detto...

    Tu sês invidât ae http://ilfurlanist.splinder.com/post/15169890Eletrocjadenefurlane di Nadâl  

  2. Jaio ha detto...

    Po ben,brut crot ch'a no tu sês âltri, o vevi chê di scrivi alc sù Capello, ma no dome a tu mi âs gjavât il pan de bocje ma a tu as scrit alc ch'o no varès podût scrivi. Biele storiute. plasê di scuvierzile achi.  

  3. furlan ha detto...

    Al è antipatic e al vinç. Pussibil che par jessi vincents bisugne jessi ruspi o pies antioatics?
    Mi plasin plui chei furlans come Vidoz o la Paruzzi che a son vincents ma a son ancje ninins.  

  4. il crot ha detto...

    Dacuardi su Vidoz e la Paruzzi, lis robis a son difarentis par altris che a son simpaticons cuant che tu cjacaris cun lôr, ma che no ti disin lis robis in muse e dopo ti dan la curtissade par daûr...